بسم الله الرحمن الرحيم
قالت اكتب بي قصيده قلت لا والله ماني
قالت شمعنى جواهر قلت والله انك غبيه
لا تفكرت بجواهر ينطلق وحده لساني
تفتخر فيها المعاني والحروف الابجديه
من غديت ابها متيم انولدت انسان ثاني
عقب ما كانت جروحي تضحك وتشره عليه
في جواهر شفت نفسي سابق الوقت وزماني
علمتني كيف احب وكيف اتناسى الاسيه
قبلها وبكل صراحه كنت مغرور واناني
وعقبها شوفة عيونك كل مافيني هديه
هذي والله دعوة امي واستجاب الله ورماني
في ينابيع الحنان وطيب هذي الادميه
اتركيني في جواهر اكتب وابدع عساني
اقدر بشعري اخلد اسمها بين البريه
باكر الكل يتحاكي عن قصيده لقحطاني
قالها فشمسٍ تعلت شمس ليلى العامريه
في طهارتها سحايب في صراحتها مواني
في ملامحها خمايل في مشاعرها عطيه
في ابتسامتها خيال وفي سوالفها اغاني
في امانيها طموح وفي التحاور منطقيه
في بداوتها رياض وفي فصاحتها معاني
في برائتها طفوله وفي مقالبها شقيه
نبض دقات الخفوق وملهمة عزف المعاني
وين مالديت قلبي شفت فيها الشاعريه
لو تهورت وكتبت بغيرها قام وهجاني
شعري اللي من عرفها قال يا خالد وصيه
لا تغرك شاعريتك واتحدى واتعصاني
والله ان سحبة بساط الشعر من تحتك بديه
لا توصيني يا شعري في جواهر عنفواني
ما يرد القلب عنها غير تقرير المنيه
وانتي يللي تسئليني اكتبك والرد ماني
مدري غيرتي سؤالك ولا للحينك غبيه
تحياتي لكم:لينا(اتمنى ان تعجبكمالقصيدة)
الإثنين فبراير 23, 2009 11:46 pm